தஞ்சாவூர் பெரிய கோவிலில் ராஜராஜ சோழனின் சதய விழா வரும் அக்டோபர் 24 மற்றும் 25 ஆகிய 2 நாட்கள் வெகு விமர்சையாக கொண்டாடப்படவுள்ளது.

தஞ்சை பெரிய கோயிலில் ஆண்டுதோறும் ராஜராஜ சோழனின் ஐப்பசி சதய விழா நடைபெறுவது வழக்கமாக உள்ளது. ராஜராஜ சோழனால் கட்டப்பட்ட தஞ்சை பெரிய கோவில் தமிழர்களின் கட்டிடக்கலைக்கு சான்றாக திகழ்கிறது.

1003-1004 ஆம் ஆண்டு தொடங்கி 1010 ஆம் ஆண்டு கட்டி முடிக்கப்பட்ட இந்த கோவில் ஆயிரம் ஆண்டுகளை கடந்து கம்பீரமாக காட்சியளித்து வருகிறது. இந்த கோவில் உலகம் போற்றும் கட்டடக்கலை அம்சத்தைக் கொண்டுள்ளது. இத்தகைய புகழ்பெற்ற தஞ்சை பெரிய கோவில் யுனெஸ்கோவால் பாரம்பரிய சின்னமாக அறிவிக்கப்பட்டு உள்ளது.

ராஜராஜ சோழனின் சதய விழா

தஞ்சை பெரிய கோவிலில் ஆண்டும் தோறும் ராஜராஜ சோழனின் சதய விழா கொண்டாடப்பட்டு வருகிறது. மாமன்னன் ராஜராஜ சோழனின் பிறந்த நாளை அவர் பிறந்த விண்மீனாகிய ஐப்பசி சதய நாளன்று சதய விழாவாகக் கொண்டாடப்படுகிறது. கி.பி 985ம் ஆண்டு சதய நட்சத்திரத்தில் ராஜராஜ சோழனுக்கு முடி சூட்டப்பட்டதை நினைவு கூறும் விதமாகவும் இவ்விழா கொண்டாடப்பட்டு வருகிறது

அந்த வகையில் தஞ்சாவூர் பெரியகோவிலில் மாமன்னர் ராஜராஜ சோழனின் 1038 வது ஆண்டு சதய விழா வரும் அக்டோபர் 24 மற்றும் 25 ஆகிய 2 நாட்கள் கொண்டாடப்படவுள்ளது. 1038 வது சதய விழா வரும் 24 ஆம் தேதி தொடங்குகிறது மற்றும் 25 ஆம் தேதி மன்னர் ராஜராஜசோழன் சிலைக்கு மாலை அணிவிக்கும் நிகழ்ச்சி நடைபெறவுள்ளது. கடந்த ஆண்டு தமிழக அரசு அறிவித்தபடி, சதய விழா அரசு விழாவாக நடைபெற உள்ளது.

​பந்தல் கால் நடும் நிகழ்ச்சி !!

சதய விழாவுக்கான பந்தல் கால் நடும் நிகழ்ச்சி இன்று தஞ்சை பெரிய கோவிலில் நடைபெற்றது. பந்தக் காலுக்கு பூஜைகளும், தீபாராதனையும் செய்யப்பட்ட பின்னர் பந்தக்கால் நடப்பட்டது.

அக்டோபர் 24, 25 ஆகிய இரு நாட்கள் நடக்கும் ராஜராஜசோழனின் சதய விழாவில் நாட்டிய நாடகம், கருத்தரங்கம், கவியரங்கம், பட்டிமன்றம், திருமுறை அரங்கம், நாட்டிய நிகழ்ச்சி உள்ளிட்ட பல்வேறு கலை நிகழ்ச்சிகள் நடைபெறவுள்ளது குறிப்பிடத்தக்கது. இந்த இரண்டு நாட்களும் தஞ்சை பெரிய கோவில் மின் விளக்குகளால் ஜொலித்து விழா கோலம் பெற உள்ளது.

ராஜராஜ சோழ மன்னரின் 1038 வது சதய விழாவை முன்னிட்டு, தஞ்சாவூர் மாவட்டத்திற்கு வரும் அக்டோபர் 25 ஆம் தேதி உள்ளூர் விடுமுறை அறிவித்து அம்மாவட்ட ஆட்சியர் உத்தரவு பிறப்பித்துள்ளார்.

Disclaimer :
This story is auto-aggregated by a computer program and has not been created or edited by Voice Up.
Publisher : Lokal APP